Habang patuloy na nagaganap ang mga digmaan, lindol, at mga sakuna, tumunog na ba ang mga trumpeta ng huling kapanahunan na binanggit sa Pahayag? Ang pitong trumpeta ba ay babala ng paghatol o isang tawag sa kaligtasan? Balikan natin ang Bibliya upang mahanap ang mga sagot tungkol sa kaugnayan ng pitong trumpeta at ang ikalawang pagparito ni Cristo.

Quick Navigation

I. Ano Nga Ba Talaga ang Ipinapahiwatig ng Pitong Trumpeta?

II. Ang Pitong Trumpeta sa Pahayag: Mga Sakuna sa Huling Panahon at ang mga Kaguluhan ng Panahong Ito

III. Tumunog Na ang Pitong Trumpeta: Nagbalik Na Si Cristo Upang Isagawa ang Gawain ng Pagliligtas sa mga Huling Araw

IV. Ang Pitong Trumpeta ay Kapwa Paghatol at Kaligtasan

V. Muling Tumunog ang Pitong Trumpeta: Ang Kapanahunan ay Patungo na sa Katapusan Nito

VI. Konklusyon: Ang Paalala at Payo ng Diyos—Huwag Palampasin ang Huling Tawag

I. Ano Nga Ba Talaga ang Ipinapahiwatig ng Pitong Trumpeta?

Sa Aklat ng Pahayag, mayroong isang lubhang misteryoso at kagila-gilalas na propesiya—ang pitong trumpeta.

Sa isang pangitain, nakita ng apostol na si Juan ang pitong anghel na nakatayo sa harap ng Diyos, at ang bawat isa ay may hawak na trumpeta. Nang tumunog ang mga trumpeta, ang mundo, ang dagat, ang mga ilog, ang araw, ang buwan, ang mga bituin, at ang mundo ng tao ay marahas na niyanig. Pagkatapos ay dumating ang mga pangitain ng mga digmaan, paghatol, at ang pagpapakita ng Kaharian.

Sa loob ng dalawang libong taon, maraming mga Kristiyano ang nag-iisip: Ano nga ba talaga ang ipinahihiwatig ng pitong trumpeta? Ano ang kaugnayan ng mga pangitaing ito sa mga huling araw? Kailan tutunog ang pitong trumpeta? At ano ang kaugnayan ng mga ito sa ikalawang pagparito ni Cristo?

Sa kasalukuyan, nakikita natin ang patuloy na mga digmaan, lindol, baha, tagtuyot, sunog, matinding panahon, at iba’t ibang sakuna na sunod-sunod na nangyayari, habang ang sitwasyon sa buong mundo ay lalong nagiging magulo. Sa harap ng lahat ng ito, madaling mabalot ang mga tao ng takot, ngunit kakaunti lamang ang humihinto upang pag-isipan: Bakit hinahayaan ng Diyos na mangyari ang mga bagay na ito?

Kung ang mga kaguluhang ito ay nagpapaalala sa sangkatauhan na dumating na ang mga huling araw, kung gayon ang pinaka-kailangang pagtuunan ng pansin ay hindi lamang kung ano ang susunod na sakuna, kundi kung “tumunog na ba ang mga trumpeta ng mga huling araw, natupad na ba ang mga propesiya tungkol sa pagbabalik ni Cristo, at sinimulan na ba ng Diyos ang Kanyang gawain ng pagliligtas sa sangkatauhan sa mga huling araw sa kasalukuyan.”

Upang maunawaan ang mga katanungang ito, kailangan nating bumalik sa Aklat ng Pahayag at unawain ang tunay na kahalagahan ng pitong trumpeta.

II. Ang Pitong Trumpeta sa Pahayag: Mga Sakuna sa Huling Panahon at ang mga Kaguluhan ng Panahong Ito

Nakatala sa Kabanata 8 ng Aklat ng Pahayag na matapos buksan ang ikapitong tatak, nakita ni Juan ang pitong anghel na nakatayo sa harap ng Diyos, at binigyan sila ng pitong trumpeta.

Nang tumunog ang unang trumpeta, bumagsak sa lupa ang yelo at apoy na may halong dugo, at ang ikatlong bahagi ng lupa at ng mga puno ay nasunog.

Nang tumunog ang ikalawang trumpeta, mayroong itinapon sa dagat na tila isang malaking bundok na nagliliyab sa apoy, at ang ikatlong bahagi ng dagat ay naging dugo.

Nang tumunog ang ikatlong trumpeta, isang malaking nagniningas na bituin ang nalaglag mula sa langit, na nagpadumi sa mga ilog at sa mga pinagmumulan ng tubig.

Nang tumunog ang ikaapat na trumpeta, tinamaan ang araw, buwan, at mga bituin, at naapektuhan ang araw at gabi.

Nang tumunog ang ikalimang trumpeta, nabuksan ang walang-hanggang kalaliman, at nakakita si Juan ng pangitain ng mga balang.

Nang tumunog ang ikaanim na trumpeta, nagkaroon ng mga digmaan at malalaking sakuna.

Nang tumunog ang ikapitong trumpeta, may malakas na tinig mula sa langit na nagsabing, “Ang kaharian ng sanglibutan ay naging sa ating Panginoon, at sa Kanyang Cristo: at Siya’y maghahari magpakailan kailan man” (Pahayag 11:15).

Mula sa mga pangitaing ito, makikita natin na ang pitong trumpeta ay hindi lamang naglalarawan ng pitong hiwalay na sakuna, kundi nagpapakita ng pangkalahatang larawan ng mga kaguluhan, paghatol, at ang huling pagpapakita ng kaharian sa mga huling araw.

Kaya naman, kapag nakikita natin ang mga digmaan, lindol, taggutom, at iba’t ibang sakuna na nangyayari ngayon, bagaman hindi natin maaaring itumbas ang isang partikular na lindol o baha sa totoong mundo sa isa sa mga trumpeta sa Pahayag, hindi rin natin maaaring balewalain ang mga babala ng Panginoon tungkol sa mga huling araw.

Minsang sinabi ng Panginoong Jesucristo, “Sapagkat magsisitindig ang bansa laban sa bansa, at ang kaharian laban sa kaharian; at magkakagutom at lilindol sa iba’t ibang dako. Datapuwat ang lahat ng mga bagay na ito ay siyang pasimula ng kahirapan” (Marcos 13:8). “At magkakaroon ng mga tanda sa araw at buwan at mga bituin; at sa lupa’y magkakaroon ng kasalatan sa mga bansa, na matitilihan” (Lucas 21:25). Ang mga propesiyang ito ay patuloy na nagpapaalala sa atin na ang mga huling araw ay hindi maiiwasang sasamahan ng iba’t ibang sakuna at malalaking kaguluhan.

Kung gayon, bakit pinahihintulutan ng Diyos na makita ng mga tao ang mga bagay na ito? Nagbigay ang mga salita ng Diyos ng isang mahalagang sagot.

Sabi ng Diyos, “Tumutunog ang Aking pitong trumpeta, na gumigising sa mga natutulog! Bumangon ka agad, hindi pa huli ang lahat. Alagaan mo ang iyong buhay! Buksan mo ang iyong mga mata at tingnan kung anong oras na ngayon. Ano pa ang dapat hanapin? Ano pa ang dapat pag-isipan? At ano pa ang kakapitan? Hindi mo ba kailanman naisaalang-alang ang kaibahan ng halaga sa pagitan ng pagkakamit ng Aking buhay at pagkakamit ng kung ano ang minamahal at kinakapitan mo? Huwag nang maging sutil o maglaro-laro. Huwag mong palampasin ang pagkakataong ito. Ang sandaling ito ay hindi na muling darating!” (Ang Salita, Vol. I. Ang Pagpapakita at Gawain ng Diyos. Mga Pagbigkas ni Cristo sa Pasimula, Kabanata 36). Mula sa mga salita ng Diyos, makikita natin na ang kahalagahan ng pitong trumpeta ay hindi lamang tungkol sa mga malalaking sakuna, kundi tungkol din sa paggising. Ang pagtunog ng mga trumpeta ay nilalayong gisingin ang mga natutulog at maging sanhi upang muling isaalang-alang ng mga tao ang kanilang buhay, ang kanilang landas, at ang kanilang huling destinasyon. Kaya naman, kapag nahaharap sa mga kaguluhang patuloy na nangyayari ngayon, hindi lamang tayo dapat matakot. Sa halip, dapat tayong maging mapagbantay: Ginagamit ba ng Diyos ang mga bagay na ito upang paalalahanan ang sangkatauhan na dumating na ang panahon ng mga huling araw?

III. Tumunog Na ang Pitong Trumpeta: Nagbalik Na Si Cristo Upang Isagawa ang Gawain ng Pagliligtas sa mga Huling Araw

Ang pag-unawa sa pitong trumpeta ay hindi dapat huminto sa mga sakuna mismo. Mula sa simula ng kanilang pagtugtog hanggang sa kanilang huling pagtatapos, ang pitong trumpeta ay hindi pitong hiwalay na mga pangyayari, kundi isang kumpletong proseso sa mga huling araw. Tumutkoy ang mga ito sa pagtatapos ng lumang kapanahunan, gayundin ang pagsisimula at ganap na pagkumpleto ng gawain ng Diyos sa mga huling araw.

Kaya naman, ang pagsasabing “tumunog na ang pitong trumpeta” ay hindi nangangahulugang basta-basta na iniuugnay sa bawat sakuna na nangyayari ngayon sa una, ikalawa, o ikatlong trumpeta. Sa halip, nangangahulugan ito na ang mga trumpeta ng mga huling araw ay tumunog na, at ang gawain ng Diyos sa paggising, paghatol, at pagliligtas sa sangkatauhan ay nagsimula na at patuloy na patungo sa ganap na pagkumpleto nito. Dito lumlitaw ang isang mahalagang tanong: Kung ang pitong trumpeta ay tumunog na, nasaan ang gawain ng nagbalik na Cristo?

Maraming tao ang naniniwala na ang Panginoon ay tiyak na babalik, ngunit palagi silang nakatingin sa langit, naghihintay sa araw na hayagang bababa ang Panginoon sa isang ulap. Gayumpaman, ang mga propesiya tungkol sa pagbabalik ng Panginoong Jesus ay hindi lamang tungkol sa Kanyang pampublikong pagpapakita.

Sinabi ng Panginoon, “Narito, Ako’y pumaparitong gaya ng magnanakaw” (Pahayag 16:15). “Kayo rin naman ay magsipaghanda: sapagkat sa oras na hindi ninyo iniisip, ang Anak ng tao ay darating” (Lucas 12:40). Ipinropesiya rin ng Panginoong Jesus, “Mayroon pa Akong maraming bagay na sa inyo ay sasabihin, ngunit ngayon ay hindi ninyo kakayanin. Gayunman ay kapag Siya, ang Espiritu ng katotohanan, ay dumating, papatnubayan Niya kayo sa buong katotohanan” (Juan 16:12–13). “Pakabanalin Mo sila sa katotohanan: Ang Iyong daan ay katotohanan” (Juan 17:17). Ipinapakita sa atin ng mga salitang ito na ang ikalawang pagparito ni Cristo ay hindi lamang tungkol sa Kanyang pagpapakita, kundi higit na mahalaga, tungkol sa pagpapahayag ng katotohanan, ang pagdadalisay sa buhay ng tao, at sa pagpapabanal ng tao.

Ayon sa gawain ng Diyos sa mga huling araw, ang Cristo ay babalik sa pamamagitan ng pagpapakita muna sa sangkatauhan sa katawang-tao bilang Anak ng tao, na nagpapahayag ng katotohanan at nagsasagawa ng gawain ng paghatol at pagliligtas sa mga huling araw. Hindi lamang Siya dumarating upang sabihin sa mga tao kung kailan darating ang mga sakuna, kundi upang lutasin ang pinakapundamental na problema ng sangkatauhan—ang kasalanan.

Bagaman ang mga kasalanan ng mga tao ay pinatawad na sa pamamagitan ng pagtubos ng Panginoong Jesucristo, madalas pa ring nabubuhay ang tao sa siklo ng pagkakasala, pagkukumpisal ng kanilang mga kasalanan, at muling pagkakasala. Ang mga tiwaling disposisyon tulad ng paninibugho, pagsisinungaling, pagmamataas, pagkamakasarili, pag-iimbot, at pagkamuhi ay nananatiling may kapangyarihan sa loob nila. Kaya naman, kailangang ipahayag ni Cristo sa mga huling araw ang katotohanan upang ilantad ang tiwaling kalikasan ng mga tao, hatulan ang kanilang mga kasalanan, at linisin ang kanilang katiwalian, upang ang mga tao ay tunay na makalaya mula sa kasalanan at maging mga taong nagpapasakop at natatakot sa Diyos. Ito ang mahalagang koneksyon sa pagitan ng pitong trumpeta at ang ikalawang pagparito ni Cristo: Ginigising ng pitong trumpeta ang mga tao sa mga huling araw, habang ang ikalawang pagparito ni Cristo ay nagdadala ng katotohanan ng mga huling araw at ng gawain ng lubusang pagliligtas sa sangkatauhan.

Sabi ng Diyos, “Agad kang tumayo, magkaroon ng kakayahang sanayin ang sarili mo sa paggamit ng iyong espiritu, magkaroon ng kakayahang gumamit ng sari-saring kasangkapan para makilatis at mahadlangan ang maraming pakana at panlilinlang ni Satanas, at magtagumpay ka laban kay Satanas, upang mas lumalim ang iyong buhay karanasan at maisabuhay mo ang Aking disposisyon, upang maging hinog at magkaroon ng maraming karanasan ang iyong buhay, at palagi kang makasabay sa Aking mga yapak. Huwag panghinaan ng loob o maging mahina, kundi palaging kumilos pasulong, paisa-isang hakbang, tuluy-tuloy hanggang sa dulo ng daan!” (Ang Salita, Vol. I. Ang Pagpapakita at Gawain ng Diyos. Mga Pagbigkas ni Cristo sa Pasimula, Kabanata 36).

Ito ang apurahang tawag ng Diyos, na nagpapaalala sa mga tao na huwag manatiling natutulog at huwag lamang magtuon sa kung kailan darating ang mga sakuna, kundi hanapin ang tinig ng Diyos, siyasatin ang mga katotohanang ipinahayag ng Diyos sa mga huling araw, hanapin ang mga yapak ng ikalawang pagparito ni Cristo, at tanggapin ang pagliligtas ng Diyos sa mga huling araw.

IV. Ang Pitong Trumpeta ay Kapwa Paghatol at Kaligtasan

Ang pitong trumpeta ay may isa pang napakahalagang kahulugan: Ang mga ito ay kapwa mga trumpeta ng paghatol at mga trumpeta ng kaligtasan.

Sabi ng Diyos, “Kapag tumunog muli ang pitong trumpeta, ito ang magiging tunog ng trumpeta ng paghatol, paghatol sa mga anak ng paghihimagsik, paghatol sa di-mabilang na mga bayan at tao, at bawat bansa ay susuko sa harap ng Diyos. Ang maluwalhating mukha ng Diyos ay tiyak na magpapakita sa harap ng di-mabilang na mga bayan at tao. Bawat isa ay lubos na makukumbinsi, at tatawag sa tunay na Diyos nang walang katapusan. Ang Diyos na makapangyarihan sa lahat ay lalo pang magiging maluwalhati, at Ako at ang Aking mga anak ay magkakamit ng kaluwalhatian at sama-samang maghahari, hinahatulan ang di-mabilang na mga bayan at tao, pinarurusahan ang masama, inililigtas at kinahahabagan ang mga taong nahirang Ko, at ginagawang matibay at matatag ang kaharian. Sa pamamagitan ng tunog ng pitong trumpeta, napakaraming tao ang maliligtas, na babalik sa harap Ko upang lumuhod at sumamba na may patuloy na pagpupuri!” (Ang Salita, Vol. I. Ang Pagpapakita at Gawain ng Diyos. Mga Pagbigkas ni Cristo sa Pasimula, Kabanata 36). Ang mga salitang ito ay naghahayag ng dalawang aspeto ng kahalagahan ng pitong trumpeta. Para sa mga handang makinig sa tinig ng Diyos, maghanap ng katotohanan, magsisi, at bumaling sa Diyos, ang pitong trumpeta ay isang tawag sa kaligtasan; para sa mga tumatanggi sa katotohanan, naghihimagsik laban sa Diyos, at lumalaban sa gawain ng Diyos, ang pitong trumpeta ay nangangahulugang paghatol. Samakatwid, kapag nahaharap sa mga sakuna, ang mga tao ay hindi lamang dapat matakot, o kaya ay magdasal lamang na panatilihin sila ng Diyos na ligtas at payapa nang hindi pinagninilayan ang kanilang relasyon sa Diyos. Sapagkat ang tunay na kanlungan ay hindi lamang isang paraan upang pansamantalang makatakas sa isang sakuna sa laman. Ang tunay na kaligtasan ay ang pagtatamo ng mga tao ng katotohanan sa pamamagitan ng gawain ng Diyos sa mga huling araw, ang paglaya mula sa kasalanan, at ang pagbabalik sa harap ng Diyos. Kaya naman, ang pitong trumpeta ay kapwa paghatol at kaligtasan. Hindi lamang nito ipinapahayag ang kalalabasan ng mga tao, kundi nagdadala rin ito sa bawat isa sa isang pagpili: Tatanggapin mo ba ang pagliligtas ng Diyos sa mga huling araw, o patuloy mong itatakwil ang Diyos?

V. Muling Tumunog ang Pitong Trumpeta: Ang Kapanahunan ay Patungo na sa Katapusan Nito

Kung ang mga trumpeta na nabanggit kanina ay nagdadala ng paggising at paghatol, kung gayon ang huling itinuturo ng pitong trumpeta ay ang pagtatapos ng isang kapanahunan at ang pagsisimula ng isa pa.

Sabi ng Diyos, “Kapag muli pang tumunog ang pitong trumpeta, ito ang magiging panghuling bahagi ng kapanahunan, ang pagtunog ng trumpeta ng tagumpay laban sa mga diyablo at kay Satanas, ang pagpupugay na nagdedeklara ng pagsisimula ng hayagang pamumuhay sa kaharian sa lupa! Sadyang napakatayog na tunog, itong tunog na umaalingawngaw sa palibot ng trono, itong pagtunog ng trumpetang yumayanig sa langit at lupa, na siyang tanda ng tagumpay ng Aking plano ng pamamahala, at na nagmamarka ng paghatol kay Satanas; hinahatulan nito ang lumang mundong ito ng ganap na kamatayan, na maitapon sa walang hanggang hukay! Ang pagtunog na ito ng trumpeta ay nagpapahiwatig na magsasara na ang tarangkahan ng biyaya, na ang buhay ng kaharian ay magsisimula na sa lupa, na tama at marapat. Inililigtas ng Diyos yaong mga nagmamahal sa Kanya. Sa sandaling bumalik ang mga ito sa Kanyang kaharian, ang mga tao sa lupa ay haharap sa taggutom at salot, at ang pitong mangkok at pitong salot ng Diyos ay pakakawalan nang sunod-sunod. Ang langit at lupa ay lilipas, ngunit hindi lilipas ang Aking salita!” (Ang Salita, Vol. I. Ang Pagpapakita at Gawain ng Diyos. Mga Pagbigkas ni Cristo sa Pasimula, Kabanata 36).

Higit pang inihahayag ng mga salita ng Diyos ang mas malalim na kahalagahan ng pitong trumpeta: Ang kapanahunang ito ay patungo na sa katapusan nito. Samakatwid, ang pitong trumpeta ay hindi isang propesiya na maaaring pag-aralan nang walang katapusan nang hindi nangangailangan ng tugon, dahil may kinalaman ang mga ito sa mga kalalabasan at hantungan ng tao. Partikular na nagbabala ang mga salita ng Diyos na, “Ang pagtunog na ito ng trumpeta ay nagpapahiwatig na magsasara na ang tarangkahan ng biyay,” na ang ibig sabihin ay hindi walang hanggan ang ating pagkakataon na tanggapin ang Panginoon at ang pagliligtas ng Diyos sa mga huling araw. Sa ngayon, magagawa pa rin nating marinig ang mga paalala ng Diyos, hanapin ang mga yapak ng ikalawang pagparito ni Cristo, at siyasatin ang Kanyang gawain sa mga huling araw. Ito ay isang mahalagang pagkakataon na ipinagkaloob sa atin ng Diyos. Gayumpaman, kung ang isang tao ay patuloy na mag-iisip ng, “Haharapin ko na lang iyan sa susunod,” “hindi pa naman kailangan ngayon,” o “hahanapin ko na lang ang Diyos kapag talagang dumating na ang mga sakuna,” maaaring mawala sa kanila ang kanilang huling pagkakataon sa pagliligtas ng Diyos.

Kaya naman, ngayong tumunog na ang pitong trumpeta, hindi tayo maaaring manatiling tagamasid lamang magpakailanman. Patuloy na sumusulong ang kapanahunan, patuloy na sumusulong ang gawain ng Diyos, at ang mga tao ay dapat ding gumawa ng sarili nilang pagpili.

VI. Konklusyon: Ang Paalala at Payo ng Diyos—Huwag Palampasin ang Huling Tawag

Bakit paulit-ulit na nagpapaalaala ang Diyos sa mga tao? Bakit hinahayaan Niya na makita ng mga tao nang maaga ang mga sakuna, paghatol, at ang kalalabasan ng panahong ito sa mga huling araw? Dahil hindi nais ng Diyos na mapahamak ang mga tao, kundi hinihintay Niya silang magbalik-loob.

Sabi ng Diyos, “Walang nakakaalam na ang dahilan ng paulit-ulit na mga paalaala at panghihikayat ng Diyos sa tao ay dahil inihanda na Niya sa Kanyang mga kamay ang mga kalamidad na wala pang katulad, mga kalamidad na hindi kakayanin ng katawan at kaluluwa ng tao, hindi lamang isang kaparusahan sa laman, kundi mga kaparusahan na pumupuntirya sa kaluluwa ng tao. Kailangan mong malaman ito: Anong klase ng galit ang pakakawalan ng Diyos kapag hindi natupad ang plano Niya, at kapag hindi nasuklian ang Kanyang mga paalaala at panghihikayat? Isang bagay ito na hindi pa kailanman naranasan o nalaman ng sinumang nilikha. Kaya sinasabi Ko, ang mga kalamidad na ito ay wala pang katulad, at hindi na mauulit kailanman. Sapagkat ang plano ng Diyos ay minsan lamang likhain ang sangkatauhan, at minsan lamang iligtas ang sangkatauhan. Ito ang unang pagkakataon, at ito rin ang huli. Samakatwid, walang makakaunawa sa mga masidhing layunin at taimtim na pag-aasam ng Diyos na iligtas ang sangkatauhan sa pagkakataong ito” (Ang Salita, Vol. I. Ang Pagpapakita at Gawain ng Diyos. Diyos ang Pinagmulan ng Buhay ng Tao).

Ipinapakita sa atin ng mga salita ng Diyos na sa likod ng Kanyang paulit-ulit na paalala sa mga tao ay hindi lamang paghatol, kundi ang Kanyang masigasig na pag-aalaga sa sangkatauhan at ang Kanyang apurahang inaasahan. Kaya naman, habang patuloy ang mga kaguluhan sa buong mundo, ang dapat nating tunay na isaalang-alang ay hindi kung saan susunod na magaganap ang sakuna, kundi kung ano ang sinasabi ng Diyos sa mga tao sa pamamagitan ng mga bagay na ito. Ang pitong trumpeta ay tumunog na—nagising na ba tayo? Ang gawain ng ikalawang pagparito ni Cristo ay nagsimula na—handa ba tayong aktibong maghanap? Ipinahayag na ng Diyos ang katotohanan ng mga huling araw—handa ba tayong taimtim na siyasatin ito at pakinggan ang Kanyang tinig?

Para sa mga tao sa mga huling araw, ang tunay na panganib ay hindi lamang ang pagharap sa mga sakuna, kundi ang pananatiling tulog kahit na nagpalabas na ang Diyos ng Kanyang tawag, at ang pagtangging maghanap kahit na nagkaloob na ang Diyos ng kaligtasan.

Nawa’y marinig nating lahat ang tunog ng pitong trumpeta, pahalagahan ang pagkakataong ibinibigay sa atin ng Diyos ngayon, aktibong hanapin ang gawain ng Diyos sa mga huling araw, tanggapin ang biyaya ng pagliligtas na hatid ng ikalawang pagparito ni Cristo, matanggap ang proteksyon ng Diyos sa gitna ng lumalalang mga sakuna, at sa huli ay bumalik sa kaharian ng Diyos.

Tumunog na ang mga trumpeta. Nawa’y huwag tayong maging mga taong nakaririnig ng tunog nito ngunit nananatiling natutulog.